Liquiçá, 22 Janeiru 2026 – Presidente Konsellu Konsultivu Munisipál Liquiçá realiza Enkontru Extra Ordináriu iha loron Quinta-feira (22/01/2026), oras tuku 08:00 otl, iha Salaun Enkontru Autoridade Munisipál Liquiçá, Suku Maumeta, Munisípiu Liquiçá.

Enkontru ne’e realiza ho objetivu atu garante funsionamentu di’ak Konsellu Konsultivu Munisipál nian, nudar plataforma importante ida hodi promove partisipasaun ajente sosiál no forsa ativa lokál iha prosesu formulasaun, diskusaun no ezekusaun instrumentu planeamentu estratéjiku Autoridade Munisipál, no mos iha prosesu akompañamentu no avaliasaun prestasaun bens no servisu públiku ba sidadaun sira.

Enkontru Extra Ordináriu ne’e partisipa husi membru Konsellu Konsultivu Munisipál, lideransa institusionál, no reprezentante entidade relevante sira iha munisípiu.

Ordem Trabalhu Enkontru maka hanesan tuir mai ne’e:

1. Tomada de Posse ba Membru Konsellu Konsultivu Foun ba períodu 2026–2028

2. Apresiasaun ba Orsamentu Jeral Estadu (OGE) 2026 Munisípiu Liquiçá (Aprovadu)

3. Apresiasaun no Aprovasaun Projéktu Parke Indústria Munisípiu Liquiçá, ho detallu:

-Zona A: Suku Ulmera

-Zona B: Suku Vatuvou (adisionál área Rua Maubrani, Postu Administrativu Maubara)

Ho biban ida ne’e mos Presidente Konsellu Konsultivu Munisipál Iha nia intrevensaun, hahú ho hato’o agradese ba Maromak, tanba fo nafatin forsa no moris di’ak hodi ita hotu bele hakat husi tinan 2025 ba tinan foun 2026. Nia subliña katak tinan foun signifika pasu foun ida atu hakat ba oin ho planeamentu no kompromisu hamutuk.

Prezidente esplika katak durante tinan rua liu ba, Presidente Autoridade Munisipál (PAM) ho nia ekipa konsentra liu ba preparasaun institusionál no administrativu ba prosesu desentralizasaun administrativu no poder lokál. Esplikasaun ida ne’e importante atu membru Konsellu Konsultivu bele komprende didi’ak situasaun atual no bele fó kontribuisaun konstrutiva iha diskusaun sira ne’ebé mak sei iha tuir mai.

Iha tinan 2024, munisípiu Liquiçá hetan avaliasaun husi Ministériu Administrasaun Estatal (MAE) ho rezultadu 55%, ho kategória “Sufisiente”. Rezultadu ida ne’e konsidera nudar etapa inisiál, tanba iha tinan ida de’it seidauk bele implementa hotu prosesu no sistema ne’ebé presiza.

Iha tinan 2025, iha avaliasaun ikus tinan nian iha fulan Dezembru, Munisípiu Liquiçá hatudu hadia signifikante ho rezultadu 77.78%, tama iha kategória “Boom”. Rezultadu ida ne’e hatudu mudansa husi nivel “Sufisiente” ba “Boom”.

Prezidente Konsellu Konsultivu mos hato’o informasaun katak Primeru Ministru hatete katak desizaun politika sei halo iha 2026 fulan maio para hodi hatete katak munisipiu sira nebe maka preparadu ona ba desentralizasaun no poder lokal.

Enkontru Extra Ordináriu Konsellu Konsultivu Munisipál Liquiçá ne’e sai nudar momentu importante ida hodi hametin koordinasaun, transparénsia no partisipasaun públiku, no mos nudar preparasaun ba etapa importante munisípiu nian iha prosesu desentralizasaun administrativu no governasaun lokál.

Fontes Notisias: NOTÍSIA Enkontru Extra… – Portal Munisipal Liquica | Facebook