Liquiça, 09/09/2022, I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sr.Gustavo da Cruz, partisipa iha seremónia “Deklarasaun Suku Ijiéne” iha suku Maumeta, postu-administrativu Bazartete, munisípiu Liquiça.

Objetivu hosi Deklarasaun Suku Ijiéne ne’e mak, atu muda komunidade sira-nia atitude lor-loron nian, oinsá hodi bele uza fasilidade sentina ne’e ho di’ak, hosi sentina manuál ba sentina ijiéne, nune’e labele soe fo’er arbiru no ema hot-hotu bele moris ho saudável.

Perante iha seremónia Deklarasaun Suku Ijiéne ne’e, iha nia intervensaun, I Vise-Prezidente K.E BTL, E.P hatete, Deklarasaun Suku Ijiéne ohin ne’e importante tebes ba ema hotu nia moris lor-loron nian, hodi hafanun ema hotu, atu moris ho ijiéne. Governu nafatin tau atensaun ba povu nia vida liuhosi programa ou rezolusaun sira no hetan apoiu hosi parseiru sira, hodi hatutan governu nia liman ain, atu nafatin halo advokasia ba komunidade sira hodi bele hatene, oinsá moris ijiéne iha vida lor-loron nian, hodi reduz mortalidade inan ho oan, moras kontajioza sira hosi foer. Ezekutivu ne’e mós apresia no hato’o felisitasaun ba suku Maumeta no ba lideransa sira hosi postu-administrativu Bazartete ne’ebé koopera di’ak parseiru sira, nune’e liu hosi parseiru sira nia kontribuisaun ohin bele deklara ALMO.

I Vise K.E BTL, E.P mós rekoñese kona-bá falta bee moos iha fatin ne’e, klaru katak wainhira atinji ona planu atu la-bele soe fo’er arbiru, maibé ida ne’ebé mak sai fatór determinante mak bee, hodi uza ba nesesidade sira, maibé uainhira la-iha bee, bele uza meius seluk hanesan uza sentina maran. Kona-bá bee, governu nafatin tau iha planu ba munisípiu Liquiça nian, Planu Mestre finaliza ona, iha semana kotuk, hein katak sei hakat ba faze dezeñu nian no faze sira tuir mai, molok hakat ba implementasaun sistema bee integradu iha munisípiu Liquiça no mós sei halo melloramentu tomak ba sistema bee, hein katak uainhira iha ona bee, munisípiu Liquiça bele atinji tan ba kategoria 4 no 5 kona-bá “Laiha Fo’er Sólidu” no “Laiha Bee Fo’er”.

Administradór munisípiu Liquiça sente kontente, tamba komunidade sira iha suku Maumeta, bele hetan ona sentina, no ohin bele deklara suku ijién. Iha biban ne’e mós Administradór hato’o agradesimentu ba parseiru WaterAid liu hosi nia implementadór ONG FHTL ne’ebé mak apoia ona komunidade sira iha suku refere, alende ne’e, autoridade postu ne’e mós nafatin prontu atu servisu hamutuk ho líder komunitária suku no parseiru sira iha futuru, hodi implementa mos iha suku sira seluk, iha munisípiu Liquiça. No nafatin enkoraja ba komunidade sira atu uza nafatin sentina ne’ebé mak iha ona no atu kuidadu fasilidade hirak ne’e, hodi bele uza ba tempu naruk.

Suku Maumeta iha aldeia haat. Hanesan aldeia Nartutu, Darumudapu, Maumetalau no Kaimegohou, ho totál uma kain 786, xefe família 1030 ho nia populasaun 5174 hetan ona sentina no materiál hirak ne’e hetan apoiu hosi WaterAid liu hosi programa Bee ba Feto (Water for Women), ne’ebé implementa hosi ONG FHTL.

(Média_BTL, E.P)

Fontes Notisias: 𝐊.𝐄 𝐁𝐓𝐋, 𝐄.𝐏 𝐏𝐚𝐫𝐭𝐢𝐬𝐢𝐩𝐚 𝐢𝐡𝐚… – BEE TIMOR-LESTE E.P | Facebook