SISD – Maumeta ( 3 Jullu 2026 ) – Serimónia Lansamentu ne’ebe realiza iha suku Maumeta laos deit lansa ba suku ida maibe suku 2 hanesan Suku Maumeta no Suku Lauhata iha postu Administrativu Bazartete Municipio Liquiça, ne’ebe ofisialmente lansa Plataforma Suku Digital no Jornal Parede Digital hanesan parte husi esforsu atu hasa’e transparénsia, komunikasaun públika no asesu komunidade ba informasaun importante iha nivel suku.

Governo liu husi Sekretariu Estadu Komunikasaun Sosial hala’o lansamentu Plataforma suku Digital no Jornal Parede Digital iha suku Maumeta no suku Lauhata Postu Administrativu Bazartete Municipio Liquiça.

Sekretariu Estadu Komunikasaun Sosial, Expedito Dias Ximenes hateten SECOM reprezenta IX governo nia naran lansa sentru informasaun suku digital ba iha suku Maumeta no Lauhata. No mos halo lansamentu ba Jornal Parede Digital ba eskola tolu (3) iha Municipio Liquiça. Programa refere hala’o atu bele ajuda suku sira iha tinan 2026 ate 2028 ne’e SECOM sei kria Lansamentu suku digital ne’e iha teritoriu tomak atu nune’e suku sira bele atualiza ona ho avansu era teknologia. Liu husi Lansamentu ohin loron bele fasilita ona suku rua ne’e atu hato’o informasaun ka programa la presiza lao haleu komunidade nia leet, maibe liu husi Plataforma refere bele ajuda sira fahe avizu ka informasaun ruma ba iha internet hodi komunidade bele asesu ba.

Programa ida ne’e hakarak habelar informasaun kona-ba atividade governasaun suku, planu dezenvolvimentu, avizu ofisiál, atividade komunidade, no programa sira ne’ebé relasiona ho edukasaun, saúde, agrikultura no área prioridade seluk. Plataforma digital ne’e mos sei fasilita komunidade atu asesu informasaun liu husi meius dijitál, enkuantu Jurnal Parede Digital sei sai fatin publika atu hatudu notísia no avizu aktual ba sidadaun sira.

Iha serimónia lansamentu, lideransa suku Maumeta, Victor da Silva hateten katak agradese ba Excelencia Secretario Estado SECOM, ne’ebe aprova ona proposta husi Suku 2 ne’e, liu husi lansamentu website ne’e suku rua ne’e bele fó sai saida deit mak sei lao iha suku ne’e ba iha publiku atu hatene dezenvolvimentu saida deit mak suku ne’e rasik iha.

Lansamentu refere prezensa mos husi Autoridade Municipio Liquiça reprezentande PAM, Zito A. de Oliveira da Costa hanesan Secretario Asunto Sosial no Organizasaun hateten, Liu husi Programa refere ajudas tebes suku no eskola atu kompleta liu tan dezenvolvimentu iha era digital ida ne’e. Lori Autoridade Municipio Liquiça nia naran husu atu programa ne’e laos to’o deit ba suku rua ne’e, maibe liu husi SECOM nia apoiu bele ajuda mos suku no eskola sira seluk iha Municipio Liquiça.

Ba programa Jornal Parede Digital ne’ebe lansa ba eskola tolu (3) hanesan Escola Secundaria Geral No. 1 Liquiça, Eskola Sekundaria Teknika Vokasional no Eskola Katolika São João de Brito Liquiça.

Paulo E. da Silva hanesan Diretor da Eskola Sekundaria Teknika Vokasional Municipio Liquiça hateten, Liu husi Servisu SECOM nian fasilita ona Eskola kria Website ba Jornal Parede Digital tanba ho meius ida ne’e hafasil eskola atu publika informasaun kona ba atividade no progresu ne’ebe eskola no estudante sira hala’o durante ensinu aprendigagem.

Liu husi website ofisial ida ne’e sai hanesan dalan inovasaun ida ne’ebe importante atu hametin governasaun lokal ne’ebé transparente, responsavel no inkluzivu. Inisiativa ne’e mos sei ajuda komunidade atu hetan informasaun ho lalais no aumenta partisipasaun sidadaun sira iha prosesu dezenvolvimentu suku.

Komunidade sira ne’ebé marka prezensa iha eventu ne’e simu diak programa foun ida ne’e no hatudu esperansa katak Plataforma Suku Digital no Jurnal Parede Digital bele sai meiu efetivu atu hametin komunikasaun entre autoridade suku no povu.

Suku Maumeta mak sai parte husi Postu Administrativu Bazartete, Munisípiu Liquiçá, no governu lokal kontinua promove inisiativa inovadora atu hasa’e kualidade servisu públiku no dezenvolvimentu komunidade.

Hakerek Nain                : Equipa SISD – Maumeta

Editor                               : Administradór SISD – Maumeta