SISD-MAUMETA, (07/07)-Edukasaun hanesan baze importante ba dezenvolvimentu rekursu umanu no futuru nasaun. Atu suporta prosesu aprendizajen ne’ebé efetivu, presiza fasilidade eskolar ne’ebé adekuadu no responde ba nesesidade estudante sira no profesór sira.

Liuhusi Programa Nasional Dezenvolvimentu Suku (PNDS) tinan 2026, Diresaun Edukasaun Municipio Liquica propoin projetu konstrusaun Refitóriu no Dapur iha Eskola Filial E.B. Maumeta. Projetu ida ne’e nia objetivu atu fornese fatin ida ne’ebé apropriadu ba preparasaun no distribuisaun hahán ba estudante sira, hodi hasa’e saúde, nutrisaun, no konfortu durante atividade aprendizajen.

Atualmente, Eskola Filial E.B. Maumeta seidauk iha refitóriu no dapur ne’ebé adekuadu. Situasaun ida ne’e difikulta implementasaun programa alimentasaun eskolar no atividade sira seluk ne’ebé relasiona ho preparasaun hahán. Tanba ne’e konsidera projetu ida ne’e hanesan prioridade atu melhora infraestrutura eskolar no apoia dezenvolvimentu edukasaun iha área refere.

Diretora da Escola E.B Maumeta, Lucia de Jesus Martins hateten : Agradese tebes ba projeitu ida ne’e tanba bele ajuda tebes eskola. Razaun Eskola maumeta ida ne’e nia montante estudante ne’ebe aas tebes, tan ne’e presiza Dapur no liu-liu refitoriu ida ne’e atu nune’e labarik sira han hein ordem e depois la gasta liu tempu merenda nian. 

“Hau hare progresu projeitu ida ne’e diak tebes, badaen sira hamutuk ho xefe suku no Ekipa PNDS sira iha ligasaun no komunikasaun ne’ebe diak. No ba konstrusaun lao lais tebes, iha deit semana hirak ha’u observa hahu tau ona blok/batako.” Dehan, Diretora da Escola E.B Maumeta, Lucia de Jesus Martins. (07/07)

Iha Eskola E.B Maumeta iha total Manorin hamutuk 18 pessoas, Guarda Escola nain 2, hamutuk 20 Pessoas. Numero total de alunus hamutuk 633 estudantes. Manegementu ba tempu han nian importante tebes atu bele halo ordenamentu merenda eskolar ba numeru estudante ne’ebe ass refere, ho nune’e bele oferese fatin ne’ebe seguru ba estudante tomak iha eskola E.B Maumeta.

Diretora da Escola mos husu, depois de projeitu remata, halo manutensaun ba Edifiu refere no se bele aumenta tan sala refitoriu ida, razaun hare ba numeru estudante ne’ebe kada tinan sempre sae aas. Dehan, Diretora da Escola E.B Maumeta, Lucia de Jesus Martins. (07/07)

Filomena dos Santos Galucho, nudar Ekipa PNDS Suku maumeta ne’ebe hala’o servisu loron-loron iha terenu hodi kontrolu prosesu konstrusaun Refitoriu no Dapur iha eskola E.B Maumeta hateten, Projeitu refere lao to’o ona porsentu 30% hare husi blok/batako ne’ebe sae ona no hahu kesi besi ba rin sira. Aselerasaun servisu husi badaen sira nian hatudu progresu ne’ebe diak no lais tebes prezensa ne’ebe ativu iha tempu kontrusaun durante semana tolu (3) hahu konstrusaun, no badaen sira servisu hare tuir dezenu no plano ne’ebe ekipa PNDS oferese.

Filomena mos hateten, ekipa PNDS Suku Maumeta hamutuk nain hitu (7). Orariu kontrolu servisu iha terenu tuir lista, razaun suku maumeta iha tinan 2026 iha projeitu PNDS rua mak hanesan konstrusaun Refitoriu ho Dapur Eskola E.B Maumeta ho Cor Beton iha estrada aldeia Darumudapu. Kada loron ekipa nain 7 ne’e sempre fahe ba kontrolu projeitu rua refere. Hateten, Filomena Galucho nu’udar ekipa PNDS Suku Maumeta iha intervista ho Ekipa SISD-Maumeta, (07/07).

Samuel Tadu, nu’udar badaen ne’ebe halo kontrusaun Refitoriu ho Dapur Eskola E.B Maumeta hateten, Total Badaen ba kontrusaun hamutuk nain rua (2) no ajudas hamutuk nain rua (2).Projeitu refere nia progresu bele tama ba 30% ona, la iha failansu durante konstrusaun. So bainhira tempu udan konstrusaun tenki para, bainhira udan para foin bele hahu konstrusaun fali. Material mos sempre mai tuir nia tempu ho kompletu. 

Kompania ne’ebe forsene material fabrikadu no Lokal mak kompania ho Naran “Tutuge,LDA”, kompania ne’ebe oferese material Mebel nian mak kompania ho naran “D’Alefyc”. Hateten Samuel iha intervista ho Ekipa SISD-Maumeta iha eskola E.B Maumeta, (07/07).

Aprovasaun Montante Orsamentu ba Projeitu PNDS tinan 2026 ba Refitoriu ho Dapur iha Eskola E.B Maumeta hamutuk $.22,023.25 USD. Data hahu konstrusaun refere iha dia 08 de Junho de 2026 no sei remata iha dia 08 de Outubro de 2026. Dadus refere ekipa SISD-Maumeta hetan husi Ekipa PNDS Suku Maumeta iha loron 07  de julho de 2026 iha terenu.

Ho implementasaun projetu ida ne’e, espera katak estudante sira bele hetan ambiente ne’ebé di’ak liu ba simu no konsume hahán ho maneira saudável no segura, nomós hasa’e partisipasaun komunidade iha dezenvolvimentu edukasaun lokal. Projetu ida ne’e mos reflete kompromisu komunidade atu hametin qualidade edukasaun no bem-estar ba labarik sira iha Eskola Filial E.B. Maumeta.

Hakerek       : Ekipa SISD-Maumeta

Editor           : Administrador SISD-Maumeta