SISD-Maumeta, 02 Jullu 2026 – Secretaria Estado ba Komunikasaun Social (SEKOMS) estabelese Sentru Informasaun Suku Digital iha Suku Maumeta hodi fasilita informasaun ba komunidade iha suku laran .

Diretor Nasional Desenvolvimentu Media (DNDM)  ne’ebe reprezenta Diretor Geral SEKOMS Adriano Monteiro iha abertura ba formasaun suku dijital ne’ebe halao  iha Salaun Enkontru Sede Suku Maumeta, Segunda (29/06/2026) semana ne’e hateten objektivu husi formasaun ne’e maka atu hasa’e konhesementu pessoal suku sira nian konaba oinsa hakerek, dezenha informasaun sira no publika iha Plataforma suku dijital ne’ebe establese ona iha suku.

“Objektivu husi estabelesementu Plataforma suku dijital ne’e maka atu fasilita servisu suku nian hodi fo’o sai informasaun konaba atividades suku nian, programa suku nian no dadus balun iha suku laran ba publiku liu husi website suku atu nune’e komunidade sira bele asesu, tanba ne’e importante tebes ekipa SEKOMS halao formasaun ba pessoal sira ne’ebe sei halao servisu iha parte informasaun, nune’e bele iha konhesementu hodi hakerek, dezenha no halo publikasaun informasaun liu husi Plataforma suku dijital, tanba ne’e husu ba ita bo’ot sira atu aproveita tempu ne’e ho didiak atu bele hetan esperensia balun husi ami nia formador sira”, tenik Adriano.

Iha sorin seluk Administrador Postu Adminisstrativu Bazartete João Nasimento Branz iha ninia intervensaun hateten mundo ohin loron tama iha era dijitalizasaun tanba ne’e hakarak ka lakohi tenke adapta ho era dijital, atu bele ajuda servisu sira no halo promosaun ba rikusoin ne;ebe iha.

 “Ita tenke tama iha era ida ne’e tanba bele ajuda ita, atu hakma’an ita nia servisu no  ajuda ita halo promosaun ba ita nia rikusoin sira, hanesan kultura, edukasaun, ekonomia no seluk-seluk tan. Nune’e mos liu husi Plataforma dijital, lalais liu habelar informasaun ba mundo, ida ne’e bele atrai ema atu bele hatene”; APA Bazatete ne’e hateten.

Tanba ne’e, Administrador Postu Administrativu Bazartete ne’e husu ba partisipantes atu aproveita tempu ho didiak no husu mos ba SEKOMS atu establese mos Suku dijital iha suku sira seluk iha Postu Bazartete nian.

 “Husu ba partisipantes sira hotu tenke agradese ho formasaun ida ne’e sei gratuita. Entaun partisipa ho maximu no ho didiak hodi fokus ba materia sira. Atu nune’e bele apoiu ita boot sira hodi halao servisu ho diak. Ema dehan siensia ne’e la konhese tempu. Aproveita ho didiak durante loron lima hodi halo desenvolvimentu hahu husu aldeia ba too iha leten no husu mos ba SEKOMS labele deit estabelese iha suku rua hanesan Maumeta no Lauhata maibe mos ba to’o iha suku sira hitu iha Postu Admiistrativu Bazartete nian”, dehan APA Bazartete.

Entretanto Xefi Suku Maumeta, Victor da Silva ba ekipa Sentru Informasaun Suku Dijital (SISD) Maumeta, Terça feira (30/06) hateten estrutura suku Maumeta sente orgulho tebes ba establesementu sentru informasaun suku digital, tanba bele kanaliza informasaun no fo’o sai informasaun hodi dezenvolvimentu suku Maumeta.

“Hau hanoin ida ne’e ita koalia kona-ba dezenvolvimentu ita presiza fo’o sai programa no atividade suku nian ba komunidade liu husi website suku, saida mak halo iha suku no aldeia sira atu nune’e komunidade mos bele hatene dezenvolvimentu iha suku Maumeta.

Lider maximu Suku Maumeta ho estrutura grante katak ho estabbelesementu suku dijital iha Maumeta ne’e sei lao ho diak durante nia mandate tanba nia rasik sei asegura ekipamentu sira ne’ebe maka fasilita hodi publika informasaun ba komunidade sira iha Maumeta.

Tanba ne’e Xefi Suku ne’e husu ba komunidade hotu atu bele partisipa iha dezenvolvimentu suku, asesu ba informasaun liu husi website suku nian nune’e bele hatene diak liu tan konaba progresu desenvolvimentu iha suku laran.

Joventude Feto iha Suku Maumeta, Susana Alves da Silva nudar partisipante ida iha formasaun jornalizmu baziku hateten nia sente orgulhu tanba bele hetan oportu n idade ba tuir formasaun konaba jornalismu baziku durante semana ida nia laran.

“Nudar partisipante tuir formasaun husi Sekoms, ne’ebe aprende plataforma digital  hanorin ami atu komprende mundu digital. Hau rasik senti orguilu bele partisipa iha formasaun refere hodi hasae hau nia kuinesimentu ba asesu informasaun ne’ebe fo’o sai iha website Suku Maumeta’, tenik Susana.

Hakerek Nain                : Equipa SISD – Maumeta

Editor                               : Formador JPD – SEKOMS